اخر الأخبار

صيد الاسماك بالعجين فى المياه العزبه



طرق صيد السمك بطعم العجين فى المياه العزبه

من اهم الطعوم على الاطلاق طعم العجين بكل اشكاله سواء كانت العجينه الزفره او حتى العاديه او المطبوخه و سمكه العجين هى الافضل دائما و الاكبر ,
صيد الاسماك بالعجين فى المياه العزبه







-السمك المستهدف :

تقريبا كل انواع السمك لكن الغالبيه الكبري لسمك البنى و البلطى المحمل الكبير ,
انا هتكلم عن طريقتي فى صيد العجين لان له طرق كثير فى تجهيزاته او فى طريقه صيده ,

-تجهيز العجين :

عباره عن كوب واحد من الدقيق بيتم خلطه مع نص ملعقه من ثوم البودره من عند العطار ثم يتم اضافه الماء و العجن جيد جدا جدا لحد ما تحط صباعك فى العجينه متلزقش في صباعك و تبقى زي اللبان و دة بيحصل بعد مده طويله من العجن المتواصل ,بعد ما توصل العجينه للقوام ده بتجيب حله فيها 2 لتر مياه تغلي على النار و تقطع العجين كور صغيره بحجم التطعيمه غالبا ما تكون بحجم البليه اللى كنا بنلعب بيها زمان ,و فى ناس بتلونها باللون الاحمر جذاب جدا للسمك و ممكن تبقا بيضه عادى ,
المهم بتقطع فصين توم و تحطهم فى الميه اللى على النار وقبل ما الميه تغلي تحط العجين بعد تكويره و تنتظر حوالى ربع ساعه العجين لما يستوي هايطلع على وش الميه هاتسبه بردو شويه كمان بعدها تنشفه فى مصفي و تسيبه يبرد براحته و كدة تبقى العجينه جاهزه للصيد ,

-طريقه الصيد بالعجين :

لو كنت صياد مش صبور يبقى فكك من طريقه الصيد بالعجين لان ضربته بتاخد وقت و لازم يكون الدور بتاعك معلوف مره او اتنين بعجينه علشان تجمع السمك ,
انا عموما هتكلم عن صيدي و طريقتي انا بصطاد على الكباري فله و حداف لما النهار يلمح بنزل غله و ريم على الفله و الحداف ببدأ اطعمها عجين و اسقطها جنب اعمده الكوبري و دى لازم يكون فيها حجات حلو اذا كان بني اوبلطي ,
الخيط على المكنه بيكون 45 او 50 و رمال العجين 30 فيما فوق على سن 4 و بيتم فرد الكوره فى ايدك و تنيم السم جواها و بعدين تلم العجين على السن و تبدأ تشكلها بحيث يبقى شكلها زى التقال البلحه وتكون حربه السن على اول العجينه من تحت , هتسقط الحداف مش هتخليه نايم على الارض من تحت بحيث العجينه تكون فوق القاع و تعلق سنارتك جنبك و تفتح السحب بتاع المكنه شويه بحيث ان لما السمكه تسحب تسحب خيط مش السناره , اللى بيحصل تحت الميه ان السمك الصغير بيتلم على العجينه و يبدأ ياكل فيها و السمك الكبير بيشعر بوجود اكل فا بيدخل على طول على الطعم ياكله فى الغالب بيكون بنى او بلطي ,
صيد العجين صيد ممتع لكن محتاج لشخص صبور بما فيه الكفايه .
التعليقات
0 التعليقات

ليست هناك تعليقات